相信大家對老屎忽依個term一啲都唔陌生 ，身邊梗有一個。試諗下日日番到公司見到啲好逸惡勞，又偷安苟且嘅職場老屎忽，每日朝九晚六， 渾渾噩噩，只為出糧，對公司毫無建樹，自己一成不變不特止，仲要阻住人發達。 稍為事業上有啲野心嘅人，一日啲老屎忽喺度， 一日都發唔到圍。
究竟依個職場老屎忽生態係點樣形成？歸根究底係邊個嘅錯？
- 自身性格問題，與年齡無尤
好多人都咁理解職場老屎忽：40歲以上，公司年資十年上，處於公司高位而自命不凡等等。但其實老屎忽最根深蒂固嘅問題係本身性格，絕對唔關年齡事。如果你只係廿領歲 ，但經已無左團火，又守舊保守，又唔肯創新，你一樣係老屎忽。
舉個例，如果一班五十幾歲嘅人搞start-up，但係間公司士氣好高，好願意聆聽同接受新意見，又不斷創新，咁佢地同老屎忽依個term大攬都扯唔埋。
- 歸根究底係老闆嘅錯
正所謂多做多錯，少做少錯。一間穩定嘅公司，好容易縱容一啲原地踏步冗員。如果個老細自己本身都唔信科技創新，當然唔會要求下屬學下新技能，咁佢地又點會繼續增進自己，力爭上游博上位呢？
職場老屎忽通常都係嬌生慣養嘅一群。一間公司嘅老細如果只係求穩定，不求增長進步，係一
件好危險嘅事。試諗下，依個電子年代，個老闆唔肯揼錢投資發展雲端，仲繼續用舊嘅實體
server, 下屬日復一日俾依種思維渲染，唔變質都難。
再者，老細都係人，當然會有私心，會重用啲buy佢做事方法嘅人。如果四個員工handle一個 project，其中一個係老屎忽，pitch嘅時候話首要任務係要維持公司穩定，歇後語為 “最好唔好搞咁多野, 唔好嘥咁多錢 “, 啱哂老闆心意，仲唔俾你做team lead?
跟著咩老細，就自然成係點樣嘅員工。所以唔好責怪啲老屎忽，其實佢地都係迫不得已演變出黎！記得當初為咩而堅持，如果入到一間公司貨不對辦，自己咩都學唔到，唔想演變做老屎忽嘅話，不如諗定後路啦，無謂斷送自己前途。