揾到接近完美嘅candidate, 而佢全程都表現到好有興趣好有誠意, 但臨門一腳竟然拒絕左你offer?
其實有好多揾工者都抱住見下無壞嘅心態, 喺揾工期間有幾多Interview 就去幾多, 有殺錯無放過。所以當初你就算開幾多人工, office 喺邊，都會無乜異議。見下傾下姐，試下水温又唔會有咩損失。
如果最後你都被求職者拒絕，可能有以下幾種原因。
- Package唔夠吸引
被求職者拒絕其實可能係成個Package唔夠吸引。人才深知道自己嘅價值。 如果你出手比市場低，年假又少, 又唔包醫療保險， 精明嘅candidate 就會覺得自己嘅價值被貶低。出手太低係幾乎所有公司都犯過嘅錯誤。 要留得住人才, 不妨參考下市場人工走勢，再俾高小小, 以表示誠意。
- 公司文化唔能夠切合需要
當都市人開始醒覺，追求工作同生活平衡，甚至間唔中home office, 你嘅candidate 可能都係”work smart, not hard” 嘅人。如果你公司文化仲停留緊喺” 番朝九晚九,老細未走, 細嘅唔準走”嘅思維，一定會嚇走好多有心人。要避免依種情況, 可以了解下個candidate嘅實際需要同埋背景, 例如家庭同個人嘅負擔, 從中雙方遷就下。
- Office太唔就腳
被求職者拒絕又未必一定關人工同公司文化事，公司地點都係一個重要因素。每日嘥粒幾鐘番工,放工如是, 的而且確係又嘥錢又嘥時間。試諗下你個candidate 住大埔, 但你office 喺太古，如果人工都係高小小, 一個正常人會寧願留番喺舊工司, 慳番啲車錢 。當然，面試嘅時候好多人都盡量唔會話自己介意依樣，介意嗰樣 ，但當真係成事，好多人都難免會臨時轉軑。
- 請人工序太繁複
就算人工有幾高，地理有幾方便，如果手腳慢一樣會被求職者拒絕。請人要快手, 因為人才實在流失得太快。如果拖泥帶水，叫個candidate黎面試幾輪，但又完全無反應, 又無follow up，會好令人懷疑你究竟有無誠意出offer， 好自然就會唔等你就另謀高就。
篩選申請者係一個好重要步驟。如果篩選做得好, 可以避免人才突然流失，同埋被求職者拒絕嘅情況。獵頭公司嘅角色就係做一個客觀嘅中間人，以達致雙方嘅要求都滿足到。作為HR, 其實有好多野你都控制唔到，例如office 喺邊, 出面啲人對你公司有咩評價。不過其實有個聰明啲方法可以減少被求職者拒絕，就係有策略地同啲適合嘅人見面, 而唔係嘥時間個個都見。
請一間專門嘅獵頭公司，就可以喺依方面幫到手，咁公司請人咪事半功倍囉！